Kjarni málsins

4.3.2009 | 20:01

Mikið er ánægjulegt að sjá þessa frétt. Það virkar nefnilega þannig núna að Evran er auk þess að gefa talsvert eftir gagnvart dollar, þrátt fyrir miklar efnhagsþrengingar í Bandaríkjunum. Mér sýnist hún, Evran, hafa lækkað um 35% á síðustu rúmum 6 mánuðum og margir hér í Bandaríkjunum spá því að fyrir árslok muni hún verða svipuð og dollarinn.

Það er líka orðið tímabært að hætta umræðum um Evrópusamband og gjaldmiðil. Við erum ekki á leið inní Evrópu á næstu amk 5 árum og krónan er eina verkfærið sem við höfum til að koma okkur út úr þessum erfiðleikum sem við nú stöndum frammi fyrir.

Það sem skiptir mestu máli finnst mér núna er að tryggja að þau 93% íbúa sem hafa vinnu í dag haldi henni, og að þeir sem misst hafa vinnuna á allra síðustu mánuðum fá sem flestir vinnu. Þegar sá áfangi hefur náðst þá þarf að semja um skuldir. Til að tryggja stöðuga atvinnu mætti til dæmis hugsa sér að gefa atvinnurekendum sem geta boðið ný störf á næstu tveimur árum skattafslátt fyrir hvert starf. Það er betra en atvinnuleysisstyrkir. Meiri sæmd og virðing.

Svo þarf að slá skjaldborg um krónuna, því hún ein er í boði. Það verður að tryggja að úflutningsgreinarnar verði áfram sá grunnur sem við byggjum afkomu okkar á. Þannig munum við verða vel samkeppnishæf á erlendum kaupendamörkuðum og efla ferðaþjónustuna.

Það sem líklega hefur farið verst með okkur á síðustu árum var hvað krónan var alltof hátt skráð eða menn héldu henni hárri með markaðslögmálunum. Ég hallast að því að pylsu gengið sé rétta gengið. Ein pylsa í pylsuvagni í Bandaríkjunum hefur kostað $ 2 eins lengi og ég man eftir og kostar líklega núna um kr. 240 í pylsuvagninum? Veit það ekki alveg. En ef pylsugegnið væri notað þá ætti pylsan samkvæmt gengi dagsins í dag að vera kr. 225.

Það sem skiptir fólk, manneskjuna, ( homo sapiens mestu máli er að hafa eitthvað fyrir stafni. Hafa eitthvað til að vinna að og vinna við og vera stolt og ábyrg sem þjóðfélagsþegnar. Nú er að forgangsraða og verða meðal fyrstu þjóða til að komast aftur á rétta braut.

Við getum það alveg, við höfum áður lent í kröppum dansi. Það mun enginn leysa vandann fyrir okkur það eru allar þjóðir heims að hugsa um sig og sinn hag og eiga fullt í fangi með það. Það er engin Marshall hjálp í boði.