Food and Fun að bresta á

Nú fer að líða að næstu Food and Fun hátíð en hún fer fram í Reykjavík dagana 18 til 22 mars. Vegna ýmissa örðugleika var ákveðið að fresta hátíðinni um einn mánuð en hún hefur ávallt farið fram síðustu helgina í febrúar.

Þetta er í áttunda sinn sem hátíðin er haldin og verða nú fleiri veitingastaðir með í hátíðinni en undanfarin ár. Hátíðin hefur frá fyrsta ári tekist vel og hefur almenningur á Íslandi slegið skjaldborg um hátíðina. Á síðasta ári er talið að um 18000 manns hafi notafært sér það einstaka tækifæri að fara út að borða og gera sér glaðan dag fyrri sanngjarnt verð. Það má til gamans geta þess að fyrsta árið sem hátíðin var haldin þá kostaði fjögura rétta máltíð í dollurum $ 50, í fyrra kostaði hún $ 110 og í ár 2009 ca. $ 50.

Hátíðin hefur nú fest sig í sessi meðal úrvals matreiðslumeistara um allan heim og hefur vakið athygli. Hátíðin er gott markaðsverkfæri fyrir íslensk fyrirtæki sem selja matvæli á erlendum mörkuðum og hafa fyrirtækin notfært sér hana til að bjóða viðskiptavinum og fjölmiðlafólki á hátína. Lögð hefur verið mikil áhersla á að kynna íslenskt hráefni fyrir matreiðslumönnunum sem heimsækja og taka þátt í hátíðinni.

Þá hefur það líka verið tilgangur með hátíðinni að vekja athygli okkar sjálfra á gæðum íslensks hráefnis og endalausum matreiðslumöguleikum sem hinir erlendu gestir njóta að kynna fyrir okkur. Framlegðaráhrifin af hátíðinni hafa svo verið nýtt til þess að selja og kynna íslenskan mat í úrvals veitingahúsum einkum í Bandaríkjunum og er nú unnið að því að efna til Íslandsdaga í New York, Boston og Washington á þessu ári.

Þannig er staðið að þessum dögum að íslenskir matreiðslumeistarar verða "Gesta Kokkar" á fínum veitingastöðum í viðkomandi borgum á kvöldin. Kynna fjögurra rétta máltíð á stöðunum og gefa svo fólki að smakka íslenskan mat í verslunum á daginn. Veitingastaðirnir og verslanirnar boða til blaðamannafunda í aðdraganda þessara daga og styðja okkur við markaðssetningu matvælanna og einnig er landið okkar kynnt fyrir ferðamönnum.

Þegar Food and Fun var haldin í fyrsta sinn árið 2002 var ástand í heiminum afar slæmt og menn enn ekki búnir að jafna sig á hryðjuverka árásunum í Bandaríkjunum 11 september 2001. Ferðaþjónustan var að hruni komin og fjölmörg flugfélög hættu ferðum. Þá var Food and Fun kærkomin hátíð til að snúa vörn í sókn. Nú átta árum síðar er Food and Fun aftur kærkomin því efnahagsástand heimsins er alveg að lama viðskiptalífið.  Það hefur því reynst vel að fá úrvals matreiðslumeistara til að koma á hátíðina og vona ég svo sannarlega að fólk geti notið hátíðarinnar.

Hátíð sem Food and Fun er tekur tíma að festa sig í sessi enda aðeins haldin einu sinni á ári. En við finnum það núna á viðhorfi fólks að hátíðin nýtur nú vinsemdar og virðingar meðal almennings á Íslandi og ekki síður meðal virtra matreiðslumeistara sem borið hafa hróður keppninnar um allan hinn vestræna heims.