Tímaritaútgáfa American Express, Travel and Leisture og Food and Wine

 

Risafyritæki' American Express keypti á síðasta ári fjölmiðlarisann sem gefur meðal annars út Travel and Leisure og Food and Wine sem eru útbreiddustu blöð á sínu sviði í Bandaríkjunum auk þess sem þau höfða bæði til svokallaðs efnafólks sem metur gæði framar verði. Þeir eiga einnig nokkra minni fjölmiðla.

 

Í útgáfu F&W í mars sl birtist þriggja síðna grein um íslensk matvæli og landið sem ferðamannaland. T+L skrifar reglulega um Ísland og er okkur mjög vinveitt.

Þá er American Express með afar sterkan viðskiptavinahóp sem ferðast mikið og verslar gæða vörur.

 

Þá stendur fyrirtækið fyrir matvælasýningum og ferðakynningum um landið allt reglulega og býr yfir afar öflugu sambandsneti til viðskiptavina sinna svosem ferðaheildsala. Þeir eiga einnig mjög sterka tölvugrunna og heimasíður. Það er einmitt þetta fyrirtæki sem stendur fyrir matvælakynningunni, sem að framan greinir, í New York í október nk.

 

Það væri mjög snjallt að kanna mögulegt  samstarf við þetta sterka fyrirtæki og sjá með hvaða hætti við gætum komið málefnum okkar á framfæri til lengri sem og styttri tíma er litið.

 

Málum er þannig háttað í tímarita útgáfu hér í Bandaríkjunum sem og reyndar víða um heim að fjölmiðlar sem sérhæfa sig í ferðaumfjöllun verja um 30% af efni miðlanna í mat og matvæli og svo öfugt við matvælatímaritin sem verja um30% af efninu í ferðir og ferðalög.

 

Það er því að mínu mati ekkert nema hagkvæmni sem felst í góðu samstarfi ferðaþjónustunnar og íslensks matvælaiðnaðar. Hér eru líka hvorutveggja atvinnugreina sem skila mestum erlendum tekjum inní þjóarbúið á skemmstum tíma, einsog komið hefur í ljós eftir að verðmæti krónunnar breyttist og nú dollarinn sterkastur gjaldmiðla.

Veit að það er áhugi fyrir viðræðum um Íslandsmál innan fyrirtækisins. Meira fljótlega

Staða okkar í dag og hvert stefnir

Þessi verslunarkeðja rekur nú rúmlega 300 verslanir í langflestum fylkjum Bandaríkjanna. Nú er til sölu í öllum verslunum eldisbleikja frá Íslandi. Það var lagt upp með mikið kynningarátak í öllum búðunum í janúar 2009 sem stóð í rúma 3 mánuði. Það varð til þess að nú hefur bleikjan fest sig í sessi og er stöðug sala á henni. Það var að mörgu leiti afar reynslumikið verkefni að koma ferskri bleikju frá Samherja og Landssambandi eldisstöðva í allar þessar búðir og það leiddi svo til þess að áhugi vaknaði á öllum svæðum að fjölga íslenskum afurðum í búðunum. Nú er unnið að því að koma tveimur tegundum af smjöri, (saltað og ósaltað), skyri amk 4 bragðtegundum sem stefnt er að fjölgi fljótlega, súkkulaði 4 tegundum með 33%, 45%, 56% og 70% kakóinnihaldi í allar búðirnar. Við erum að nálgast 200 búðir og stefnum að því að vera komnir í allar búðirnar í október.

 

Þá er unnið að því að selja ferskan línufisk í öllum búðunun, vonandi frystum einnig og vera helst komin í allar búðir í september/ október nk. Verður fiskurinn seldur með upprunamerkingum sem og vottun um sjálfbærar veiðar og rekjan leika til sjómans og allt vinnsluferlið.

 

Lambakjötið er einungis selt ferskt í sláturtíð frá lok ágúst til fyrstu viku í nóvember ár hvert. Unnið er að því að finna markað fyrir fryst kjöt til veitingahúsa til að halda nafni kjötsins lifandi árið um kring.

 

Vonandi getum við efnt til sameiginlegs  kynningarátaks í öllum verslunum WFM í haust. Þar verði kynntar allar afurðir sem þá verða komnar í búðirnar. Það var mjög ánægjulegt að sjá hvaða árangur kynningarherferðin í janúar 2009 með bleikjuna tókst vel og nú viljum við og markaðsdeild búðanna gera enn betur. Þeir framleiða allt kynningarefnið sjálfir og gera það fyrir afar sanngjarnt verð, við höfum einkum greitt fyrir framleiðslu efnisins.

Við stefnum að því að ferðaþjónustan njóti góðs af kynningunni í haust með því að leggja höfuðáherslu á landið, náttúruna hreinu og afurðir hennar. Má til dæmis kanna möguleika á því að fólk geti tekið þátt í  spurningasamkeppni um Ísland og verðlaunin verði Íslandsferð. Þá höfum við óskað eftir því að í bæklingum sem gefnir verða út komi fram upplýsingar um land og þjóð.

 

Með því að koma afurðum okkar í allar búðir WFM fáum við einkar gott tækifæri til að koma okkur inná heimasíðu WFM www.wholefoods.com sem heimsótt er af tugum þúsunda manna á hverjum degi. Þar má nú meðal annars finna greinar um bleikjuna og Ísland.

 

Ef reiknað er með að 2000 manns heimsæki hverja búð að meðaltali á dag og kynningarátakið standi yfir í tvo mánuði, náum við beinu sambandi inní búðunum við 600.000 viðskiptavini á dag eða 36.000.000 í heild. Þess má geta, og er nauðsynlegt, en það er að viðskiptavinir WFM eru öllu jafna vel upplýst fólk sem kann að meta matvæli á grundvelli gæðanna en ekki verðsins og því almennt um efnafólk að ræða sem ferðast og kann að meta náttúruna, dýrin og heilbrigði.

 

Á undanförnum árum hef ég efnt til Íslandsdaga einkum á A Ströndinni í Boston, New York og Washington. Þá koma úrvals matreiðslumeistara frá Íslandi sem kynna matvælin  að heiman af mikilli snilld og þekkingu  í 5 til 10 verslunum á dag. Þá hafa tengslin við Food and Fun matarhátíðina leitt til þess að samband við úrvals veitingahús er afar gott og við fengið tækifæri til að efna til Íslandsdaga með gestakokkunum okkar á kvöldin í þessum veitingahúsum.

 

Nú unnið að því að efna til Íslandsdaga amk í New York í október næstkomandi. Þá er haldin mikil matvælasýning sem American Express, Travel and Leisure ferðatímaritið og Food and Wine standa fyrir. Þar er okkur boðið að hafa íslenska kokka sem kynna afurðir okkar og vonandi tekst okkur að efna til sérstakrar íslandsviku í borginni. Okkar matreiðslumeistarar munu kynna matvæli í verslunum WFM í borginni og 5 til 10 sælkera veitingahúsum á kvöldin. Ég hef þegar talað við 7 veitingahús sem vilja verða okkur innan handar og taka þátt í verkefninu. Auk þess hafa eigendur þeirra boðist til að nota sín eigin almenningstengsla fyrirtæki til að koma okkur á framfæri og það sama hafa verslanir WFM boðist til að gera.

 

Í tengslum við atburð af þessu tagi er áríðandi að ferðaþjónustan komi að kynningunni á kraftmikinn hátt, það sama á við um menningu og sögu landsins og síðast enn ekki síst kynning á orkumöguleikum landsins og fjárfestingamöguleikum.

Markaðsmál í Bandaríkjunum

   

Vegna þeirra atburða sem átt hafa sér stað á  Ísland og vakið hafa athygli hér í Bandaríkjunum að undanförnu, fyrst sviði fjármálamarkaðanna og svo nú vegna hins áhrifamiklu eldgosa á Suðurlandi  set ég saman hér með ýmsar hugmyndir sem mig langar til að miðla og gætu komið að notum við að styrkja stöðu landsins og gefa fólki réttar upplýsingar um það sem í raun er að gerast. Einnig að velta því fyrir mér hvert leiðin liggur og hvað væri umhugsunarvert að gera, til framtíðar litið.

 

Í fyrsta lagi langar mig til að segja að þrátt fyrir allt hefur umræðan um fjármálamarkaðinn á Íslandi ekki verið beint neikvæð og ekki að mínum dómi skaðað hina áætu ímynd sem landið og íbúar þess hafa, almennt séð. Hér í Bandaríkjunum eru menn ýmsu vanir þegar talað er um fjármál og er það með allt öðrum hætti en menn eiga að venjast í Evrópu.

 

Auk .þess þekkja menn margskonar dæmi frá öðrum löndum sem leitað hafa til Ameríku um hjálp á liðunum árum og rétt að benda á í því samhengi Argentínu og Japan og nú Grikkland og jafnvel önnur Evrópuríki á næstu misserum. Þá hafa Bandaríkjamenn sjálfir verið að glíma við mjög alvarleg vandamál heima fyrir og nú liggur fyrir að þingið muni setja strangar reglur um fjármálamarkaðinn á næstu vikum, að því er virðist.

 

Umfjöllunin um eldgosin hefur verið almennt séð afar fagleg og vakið gríðarlega athygli. Held mér sé óhætt að segja, að ekki hafi beint hallað á Ísland né ímynd þess nokkurt kusk. En menn hafa sett samhengi á milli eldgosanna og horft á það frá alheims sjónarhól og hin miklu áhrif sem það hefur haft. Fjölmiðlar hafa bent á hversu lítilsmegnuð mannskepnan er þegar náttúran, í öllu sínu veldi, á í hlut. En það er ekki nokkur vafi að langtímaáhrifin munu skila sér í aukinni athygli á landinu sjálfu sem ferðamannalandi og afurðum þess.

 

Þar sem nú hefur verið ákveðið að efna til almenns kynningarátaks Íslands og afurða þess langar mig til að leggja mitt af mörkum til að sem best megi til takst og  landið sem slíkt njóti þess sem það á skilið og að sem flestir geti notið góðs af þegar til skemmri tíma er litið, að ég tali nú ekki um þegar til framtíðar er skoðað.

 

Á undaförnum árum hef ég verið að vinna að því að koma íslenskum matvælum á framfæri sem sælkeraafurðum í veitingahús og gæða matvöruverslanir Whole Foods Markets (WFM). Í starfi mínu hef ég lagt mikla áherslu á að efla tengslanet við fólk í þessum geira viðskipta sem og fjölmiðla. Þá hef ég ávallt haft í farteskinu kynningu á landinu sem ferðamannalandi og reynt  að tengja saman menningu og sögu landsins við hvert tækifæri.

 

Ég skrásetti vörumerkið “Sustainable Iceland” fyrir nokkrum árum og er það notað á allar afurðir sem við seljum fyrir hönd framleiðenda á Íslandi. Á bakvið merkið stendur að afurðirnar uppfylli skilyrði og reglugerðir  verslana Whole Foods Markets, sem eru afar strangar en mjög skýrar.

 

 Þegar nýjar afurðir eru kynntar fyrir innkaupastjórum búðanna þá fara þær í nána skoðun og greiningu í rannsóknarstofnun fyritækisins í Austin í Texas. Ef afurðin kemst í gegnum það nálarauga, senda þeir hlutlausan, löggildan vottunaraðila til Ísland, til að gera úttekt á stöðu framleiðandans. Þar er tekið tillit til meðferðar náttúrunnar, dýranna, fóðrunar, hreinleika, lyfjagjafa osfrv. Búðirnar leggja mikinn metnað í að standa við það loforð að afurðir sem seldar eru hjá þeim standist þessar kröfur.

 

Í þessu samhengi hef ér líka komið því á framfæri að orkan hafi mikla sérstöðu og styrkir það án vafa mikið sérstöðu landsins. Ég hef lengi verið talsmaður þess að við ættum að setja okkur það markmið að geta staðið við þá yfirlýsingu að vera sjálfbært land og jafnvel hið fyrsta. En það er annað mál. Ástæðan fyrir þessari hugmynd minni sem ég hef verið talsmaður fyrir í 13 ár er sú að það eru ekki nein lönd sem ég veit um sem sett hafa sér svo metnaðarflull markmið sem þessi ákvörðun felur í sér.

 

En nú skal ég snúa mér að því sem ég vil leggja af mörkum við þetta markaðsstarf sem framundan er. Ég tel að allt það sem ég hef unnið hér sé sameign þjóðarinnar allrar og mín skylda að miðla þeirri þekkingu, reynslu og samböndum til allra sem geta notið góðs af því, verði þess óskað og áhugi fyrir hendi.

Reyni aftur

Sæl vinir og vandamenn samstarfsfólk og aðrir. Ætla nú loksins að reyna að ná takti við blogheima að nýju. Lenti í smá vandræðum heima fyrir jólin og var nokkuð illa haldinn um tíma. En nú er ég allur að braggast, já meira en það er orðinn mjög fínn og spennandi tímar framundan.

Var kominn aftur til vinnu af fullum krafti í lok febrúar en þá héldum við Food and Fun hátíðina í níunda sinn. Miðað við aðstæður þá er alveg óhætt að segja að hátíðin hafi tekist vonum framar.

Nú er því undirbúningur að tíundu hátíðinn  hafinn og verður hún haldin 9 mars á næsta ári. Þá er stefnt að því að fá topp kokka víðsvegar að úr heiminum ásamt góðu fjölmiðlafólki og gestadómurum.

Í næstu færslum birti ég hugmyndir að markaðssetningu á landinu fagra hér í Bandaríkjunm sem ég hef sett saman og er að vinna út frá. Þéssar færslur eru settar saman fyrir samstarfsfyrirtækin sem ég vinn fyrir og með.

Frábærar

Þessar myndir hans Raxa eru bara hrein listaverk og vekja verðskuldaða athygli um heim allan.

Ekki síst núna í umræðunni um loftslagsfund SÞ í Kaupamannahöfn sem hefst á morgun. Rax er bara listamaður.

Rax í New York Times

Fjölgun verslana sem selja íslenskar afurðir- lokaorð

Í þessum undirbúningi höfum við nánast eingöngu verið í verslunum  Whole Foods Market með Sustainable Iceland afurðir  á svæðinu kringum Washington, sem og svæðunum í kringum Boston og New York og hægt og sígandi náð aukinni sölu án teljandi áhættu.

Nú  hef ég  einnig rætt við forstöðumenn hinna ýmsu deilda WFM í aðalbækistöðvum fyrirtækisins í Austin í Texas en þar, reyndar einsog á öllum svæðunum tíu, eru sérstakir menn yfir hverri deild fyrir sig. Enginn einn sem ræður öllu. Þetta er lýðræðið þeirra og gerir það að verkum að það er nauðsynlegt að vera í góðum tengslum við allar deildir þannig að við höldum því góða orðspori sem við höfum náð að ávinna okkur í samstarfinu. Það er enginn munur á Bandaríkjamönnum og öðrum hvað varðar áreiðanleika. Hann er grundvöllur árangurs til lengri tíma litið og að gagnkvæmt traust ríki á milli aðila. Þarf varla að fara mörgum orðum um mikilvægi þess að viðhalda því. 

Innan Whole Foods  háttar svo til að þegar tekin er ákvörðun af yfirmanni hverrar deildar, svokölluðum National Buyer, um að afurð skuli vera á boðstólum í öllum verslunum Whole Foods fær markaðs-, kynninga- og fjölmiðlaskrifstofan fyrirmæli um að setja saman kynningarátak í öllum búðum. 

Okkur tókst að koma bleikjunni inn í allar búðir Whole Foods í byrjun þessa árs og átti ég einkar ánægjulegt, lærdómsríkt og gott samstarf við starfsfólk þessara deilda sem og yfirmarkaðsstjóra fyrirtækisins. 

Að þeirri reynslu fenginni er okkur nú treyst til að koma afurðum á framfæri í öllum búðum Whole Food keðjunnar. Það tækifæri legg ég til að verði nýtt og þeim veitt einkaleyfisheimild á sölu afurða undir merki Sustainable Iceland næstu árin. Skal þó hafður á sá fyrirvari að náist ekki viðunandi markmið í sölu muni ekki þurfa að standa við einkaleyfið í smásölu.  Í þessu sambandi skal þess þó getið að með einkaleyfinu er ekki verið að útiloka sölu til veitingahúsa og tengdra stofnana. Þar er enn mörg tækifæri. Einkaleyfissamkomulagið tekur því aðeins til smásöluverslunar, “retail” eins og það er kallað. 

Fyrir Whole Foods Market er það þvert á móti ávinningur að sem flest gæða veitingahús selji afurðir sem aðeins fáist í þeirra búðum. Okkur hefur líka ávallt tekist vel upp, þegar við höfum fengið matreiðslumeistara frá Íslandi, til kynninga í búðum Whole Foods Market að tefla þeim fram sem gestakokkum á virtum veitingahúsum í viðkomndi borgum. Þar eigum við enn mikla ónýtta möguleika. 

Að lokum góðir fundarmenn,

 Allt starf Áforma í Bandaríkjunum hefur fyrst og fremst snúið að framtíðaruppbygginu á útflutningi  afurða undir merkjum hreinleika, gæða og hollustu frá hinu hreina og framandi landi sem Ísland sannarlega er. Það er ekki lengur minnsti vafi á því að það er framtíð á þessum markaði og af honum höfum við lært mjög mikið sem gæti komið að notum til kynningar og markaðssetningar á öðrum markaðssvæðum. Um það þarf enginn að velkjast í vafa. Auk þess má öllum vera ljóst að matvælafyrirtæki sem komast í gegnum nálarauga Whole Foods Market varðandi gæði og þjónustu fá allsstaðar viðurkenningu. Ég fullyrði að ekkert fyrirtæki né land hefur fengið þá setningu á kynningarefni sitt sem Whole Foods setti á stærsta bæklinginn sem við höfum gefið út en á forsíðu hans sagði: Whole Foods Markets is Proud to present ICELAND.  

Það er dýrmæt viðurkenning að ekki sé meira sagt. Og á henni á að vera hægt að byggja til framtíðar. 

Ég þakka áheyrnina.

Frá fundi í Dalabúð með ungum bændum hinn 23 október 2009

Food and Fun

Þá er einnig ástæða til að nefna að tekist hefur að mynda mjög sterk tengsl við veitingahús einkum í Boston, New York og Washington vegna tengslanna við Food and Fun hátíðina sem er sniðin að þörfum matvælaframleiðenda og ferðaþjónustunnar sem markaðsverkfæri til að bjóða til viðskiptavinum og einkum og sér í lagi fjölmiðlafólki.

Hátíðin hefur fest sig vel í sessi á síðustu árum og er nú orðin vel þekkt meðal margra þekktustu matreiðslumanna jafnt í Bandaríkjunum sem og í Evrópu.

Hátíðin er nú komin á lista Forbes yfir athyglisverðustu matarhátíðir í heiminum. Það tekur langan tíma að byggja upp svona árangur ekki síst vegna þess að hátíðin er einungis haldin einusinni á ári, en það hefur nú tekist, því þolinmæðin þrautir vinnur allar.

Reykjavík er því að verða þekkt sem sælkeraborg, Hótel og Matvælskólinn í Kópvogi er mikilvægur hlekkur í þessu samstarfi þar sem nemendur fá að taka þátt í hátíðinni og kynnast virtum matreiðlsumeisturum við störf. Food and Fun hátíðin er því sannarlega gullmoli í menningarflóru landsins sem efla þarf enn frekar og ekkert sem ætti að koma í veg fyrir það nema við sjálf.

Hvað væri skynsamlegt að gera næst

Hluti af ræðu sem flutt var í Dalabúð 23 október 2009

Ég dreg svo saman hér  hvað ég tel þurfa að gera til að ná auknum árangri og festa hann í sessi: 

·        Að unnið verði markvisst að því að finna góðan, hagstæðan og öflugan markað fyrir fryst lambakjöt auk þess að efla kynningarstarfið á meðan á sala á fersku kjöti stendur yfir á komandi árum. 

·        Að koma á sérstakri vottun sjávarafurða þar sem unnt er að rekja afurðina frá sjómanni, veiðisvæði og ferli á ferskum fiski. Efna til kynningar á sjáfbærum veiðum Íslendinga samkvæmt fiskveiðistjórnunarkefinu sem tók gildi árið 1983 og hefur, auk þess að vera fyrsta fiskveiðistjórnunarkerfi í veröldinni, um margt mikla sérstöðu. Whole Foods keðjan er  reiðubúin til að styðja og vinna með okkur að framgangi þess. Má bæði sjá fyrir sér kynningar sem færu fram á Íslandi sem og í Bandaríkjunum. Whole Foods hefur auk þess boðist til að taka þátt í uppbyggingu og kynningu á vottuninni og vinna að þróun hennar. Hugmyndin er að hefja sölu á fersk fiskinum í fimm verslunum til að byrja með og kaupa fiskinn af einu litlu fiskvinnslufyrirtæki til að byrja með. Þannig má sjá þetta þróast án verulegrar áhættu. 

·        Að fjölga bragðtegunum sem boðið er uppá af skyri. Nú eru í boði fjórar tegundir en æskilegt væri að þær væru sjö til átta og með því fengi skyrið helmingi stærra hillupláss í verslunum og yrði meira áberandi. 

·        Að kanna hvort unnt sé að ná fram sparnaði í framleiðslu á skyrinu með hugsanlegri lækkun tolla, breyttum umbúðum, skipta út nafni skyrsins og kalla það framvegis “Authenic ICELANDIC skyr” í stað skyr.is. Kanna má hvort unnt sé að setja auglýsingu á lok dósanna með skírskotun til heimasíðu samstarfsaðila og vekja þannig enn meir athygli á Íslandi. 

·        Að kanna hvaða ostategundir mætti bjóða uppá til að fjölga þeim í sama tilgangi og er með skyrið. Það hafa komið fram óskir um að fá sýnishorn af ostum sem gætu átt erindi á þennan markað. 

·        Að stefna að því að auka mjög hlutdeild smjörsins í neytenda pakkningum á kostnað smjörs til iðnaðarframleiðslu. Á sínum tíma voru verslanir Whole Foods tilbúnar til að kaupa allt umfram framleitt smjör sem til féll og einsog nefnt var hér að framan búnar að staðfesta kaup á allt að 500 tonnum af smjöri til notkunar í eldhúsum fyrirtækisins sem og bakaríum. Kanna má  hvort ekki sé vilji fyrir að taka þetta samstarf upp að nýju með það að leiðarljósi að stefna að því að auka við  kynningu og sölu á smjöri í neytendapakkningum. Þar með fæst hæsta mögulega verð fyrir smjörið og er það smjör á umtalsvert hærra verði en áður hefur þekkst. 

·        Að auka enn frekar áherslu á sölu á fjölbreyttara úrvali af súkkulaði og sælgæti með sömu formerkjum og nú gilda við söluna á súkkulaðinu. Það hafa verið gerðar tilraunir með markaðssetningu á páskaeggjum og jólakonfekti sem í báðum tilfellum gefur tilefni til að setja aukinn kraft í þetta viðfangsefni og koma í fastari skorður. Sem dæmi má nefna að hvergi virðist vera hefð fyrir súkkulaðipáskaeggjum í Bandaríkjunum. Þar leggja menn meiri áherslu á kanínur sem tákn páskanna. En páskaegg eru samt til og þá einkum notuð við skreytingar. Sem dæmi má nefna að við Hvíta Húsið er boðið einni fjölskyldu úr hverju fylki landsins til að leita að páskaeggjum sem dreift hefur verið á víð og dreif í garði þess. Við höfum sett málshætti í páskaeggin frá Ísland, lagt áherslu á sérstöðu þeirra og hvaðan þau koma. Það sama má segja um jólakonfekt sem gæti átt skírskotun til jólasveinanna sem auðvitað koma frá Íslandi. Það er alveg ljóst að það er grundvöllur til frekari sóknar með sælgætið. Nokkur fyrirtæki hafa sýnt því áhuga á að taka þátt í því starfi sem hér hefur verið unnið og eru þau öll áhugaverð sem samstarfsaðilar en því miður ekki verið unnt að sinna að neinu marki vegna tíma- og fjárskorts. 

·        Að efla enn frekar samstarfið við Icelandic Group USA sem á glæsilega starfsaðstöðu á austurströnd Bandaríkjanna og hefur góð sambönd á mörkuðum sem hugsanlega gætu nýst öðrum aðilum með ýmsum hætti. Það þarf að skoða. 

·        Að kanna einnig með hvaða hætti má styrkja enn frekar gott samstarf við Icelandair og Icelandair Cargo, þar sem hagsmunir fara afar vel saman og koma öllum til góða.

Flutningur og kynningar

Hluti af ræðu flutt í Dalabúð 23 október 2009

  Áformi hefur verið tryggð fjármögnun til rekstrar út árið 2010. Í ár fékk Áform kr. 25 milljónir til ráðstöfunar og sýnist mér að verkefnið geti staðið undir  rekstrar- og markaðskostnði á árinu að öllu óbreyttu. Það hefur tekist með lækkun rekstrarkostnaðar svo sem launagjöldum, húsnæði, ferðakostnaði osfrv. Á næsta ári er hinsvegar gert ráð fyrir að framlögin lækki um 20 - 30%. Samkvæmt þessu hafa því greiðslur í dollurum lækkað um 50% á þessu ári og enn aftur um allt að  30 % að auki á næsta ári. Slíkt setur okkur auðvitað í þrönga stöðu. 

Eftir sem áður höfum við enn um fimmtán mánuði upp á að hlaupa til móta hugmyndir um það hvert menn vilja stefna og hvernig menn sjá fyrir sér framtíð fyrirtækja sinna á þessum harða markaði. Ég hef bent nokkrum sinnum á mikilvægi þess að fyrirtækin eigi meira samstarf og samvinnu sín á milli til að nýta sem best fjármuni, eiga einfaldari samskipti við flutingsaðila, sérhæfa fólk til skýrslu og pappírsgerðar og hafa helst á einum stað á Íslandi fyrir hönd allra aðila einhvern sem samræmir og fylgir eftir áætlunum og dreifir upplýsingum þannig að allir séu á sama báti. 

Í upphafi verkefnisins var að ósk Whole Foods fundinn aðili til að sjá um okkar mál ganvart þeim.  Mæltu þeir með E & B´s Natural Way, fyrirtæki Blair Gordon, sem hefur reynst okkur afar vel við innflutninginn. Hann hefur unnið ötullega að okkar málum og fundið með okkur lausnir á vandamálum sem upp hafa komið sem hafa mörg verið flókin og krafist mikillar þolinmæði enda oftast um viðkvæmar afurðir að ræða, með takmarkað geymsluþol.

 

 Þar sem Whole Foods flytja sjálfir ekki inn afurðir, né kaupa almennt beint frá framleiðendum hafa þeir  á hverju svæði hér í Bandaríkjunum  sérstakan “broker” eða tengilið, sem sér um að safna saman pöntunum og fylgir eftir málum á hverju svæði fyrir sig en þau eru samtals tíu með um 20 til 30 verslanir á hverju þeirra. 

Okkur er að  takast að finna flutningsleiðir um landið allt og hefur það tekist í samvinnu við Blair sem auk okkar afurða sér um nokkur önnur  fyrirtæki sem þó ekki skarast við íslenska hagsmuni heldur þvert á móti  styður við okkar þarfir. 

Ég sé fram á að við munum fá aukna umfjöllun á næstu mánuðum  um okkar afurðir, m.a. í virtum tímaritum matgæðunga. Ég tel einnig fullvíst að við munum fá að njóta aðgerða stjórnvalda varðandi fjármuni sem ætlað er til kynninga á landi og þjóð, afurðum þess og kostum, og verður væntanlega kynnt á næstu vikum..  

Til að ná fram sem mestum stuðningi við verkefnið er mikilvægt að menn geri sér grein fyrir að kynning á landi sem ferðamannalandi fer einkar vel við kynningu á matvælum þess. Menn að sjá þetta betur og betur og því er afar áríðandi að hafa uppi trausta samvinnu milli aðila í þessu efni þar sem óhjákvæmilegt verður að nýta fjármunina betur en nokkru sinni fyrr. Um það verður þó ekki deilt að ferðamenn eiga það sameiginlegt að þurfa að nærast. Náttúra landsins er veigamikill hluti af ímynd þess og styður því einkar vel að matinn sem hún framleiðir. 

 

Íslensku afurðirnar

Framhald af ræðu 23 október 2009

Íslenska smjörið þykir einstakt og hefur yfirmaður sælkeradeilda Whole Foods sagt það hafa algera sérstöðu og sé að hennar mati langbesta smjör sem framleitt er í veröldinni. Hefur hún ekki legið á þessari skoðun sinni. Helstu keppinautar okkar í smjörinu á neytendamarkaði eru Írar með Kerrygold og Danir með Lurpak. Bæði fyrirtækin auglýsa mjög  mikið, eru áberandi í sælkeratímaritum og taka þátt í allflestum sælkerahátíðum sem reglulega eru haldnar í Bandaríkjunum á hverju ári. 

Það er síðan athyglisvert að þessar þjóðir selja annaðhvort fitusnauða hluta mjókurinnar svo sem eins og Grikkir eða selja hins vegar fituhluta mjólkurinnar líkt og Írar og Danir. MS hefur tekist að selja alla mjólkina - í formi skyrs, osta og smjörs. Smjörið hefur líka sína þýðingu við kynningu á fiski og kjöti þar sem við höfum notað það til að elda fiskinn og kjötið og bent fólki þar með á hin miklu gæði smjörsins. Hinn fallegi guli litur á smjörinu gefur því ákveðna sérstöðu en hann er til kominn vegna þess hversu íslenska smjörið er ríkt af beta-karóten efni sem finnst til dæmis í gulrótum en það myndast í náttúrunni sjálfri vegna hins stutta gróðurtímabils á Íslandi. 

Kjötið hefur hingað til einungis verið selt í sláturtíð, ferskt. Það er góð aðferð til að ná mestum gæðum  og hafa þá sérstöðu að vera árstíðabundin afurð, eða “season meat” eins og það kallast vestra og ná þannig hæsta mögulega verði. Það er aftur á móti afar mikilvægt að lengja sölutímabilið á næstu árum og brýnt er að finna markað fyrir frosið kjöt. 

Súkkulaðið okkar hefur ekki lent í neinum teljandi vandræðum varðandi innflutning til Bandaríkjanna. Hins vegar eru margar þjóðir sem framleiða súkkulaði og selja á þennan markað. Vel þekkt er afar sterk staða Belga á því sviði. Þeir auglýsa mikið gæða súkkulaði sitt en þeir leggja til þeirra kynninga umtalsverða fjármuni og gera það með miklum glæsibrag. Svisslendingar hafa einhverrra hluta vegna dregist eitthvað afturúr en eiga inni heilmikið af velvild frá gamalli tíð og hafa sterka ímynd. Nóa súkkulaðið hefur gengið vel miðað við harða samkeppni og hefur hluti af kynningunni byggist á notkun íslenska mjókurduftins. Þá hafa tilraunir með sölu á páskaeggjum gefið góða raun og verður áfram unnið að kynningu og sölu á því sem og konfekti.

 Ferskur fiskur frá Íslandi er ekki eins þekktur hjá hinum almenna neytanda í verslunum vestan hafs einsog hann er vel þekktur á fiskmörkuðum þar sem sömu menn sérhæfa sig í innkaupum. Aðal samkeppnin á ferskfiskmarkaðnum í smásöluverslun er því milli fisks af heimslóðum þar sem það á við og innflutnings frá Alaska og austurströnd Norður-Ameríku. Bleikjan aftur á móti hefur hins vegar mikla sérstöðu en helsti keppinautur hennar er laxinn sem á nú undir högg að sækja í framleiðslu vegna umhverfisvandamála. 

Það er vert að geta þess að Icelandair og Icelandair Cargo hafa stutt okkur vel við útflutninginn síðustu árin og þrátt fyrir samdrátt í fragtflugi hefur gengið ágætlega í samvinnu við félögin  að koma málum í bærilegan farveg. Nú er komin ný og miklu betri geymsluaðstaða fyrir ferskvöru á Kennedy flugvellli og léttir það róðurinn. Það hjálpar líka mikið þegar afurðir lenda í skoðun yfirvalda að hafa trausta kæligeymslu.