Að njóta vafans

Þar sem ég sit hér úti í Ameríku og les fréttir af tónleikunum heima í gær er gaman að sjá hvað vel hefur tekist til með þessum, að mörgum leiti merkilega atburði. Það að fá um 30.000 manns til að sameinast á tónleikum og hlusta á skoðanir og ræða um náttúru Íslands er auðvitað mjög merkilegt. Það sem við verðum þó að vara okkur á er að við megum ekki skiptast upp í tvo hópa og deila jafn harkalega og stundum vill verða.

Að tala svo um, í neikvæðri merkinu, um umhverfissinna sem eitthvert fólk sem lætur tilfinningar sínar ráða en ekki svokallað skynsemi getur einungis skaðað náttúruna. Það er nefnilega ekkert rangt við það að fólk hafi tilfinningar það er meira að segja frábært. Tilfinningasnautt fólk er nú ekki mjög spennandi fólk. Það hljóta því allir að vera umhverfissinnar með einum eða öðrum hætti.

Hugur íbúa annarra landa til Íslands er almennt jákvæður og virðist sem fólk hafi fengið þau skilaboð að við sem þjóð, séum að standa okkur mun betur á flestum sviðum umhverfismála en aðrar þjóðir og er það mjög ánægjulegt fyrir okkar land og afurðir þess. Það sem við verðum að gera er að halda þeirri traustu ímynd sem landið nýtur og það gerist aðeins með því að styrkja trúverðugleika okkar inná við jafnt sem út á við.

Ég hef síðustu daga fengið tækifæri til þess að tala við hundruð manna og kvenna í verslunum Whole Foods ásamt íslenskum matreiðslumeisturum og við erum allir stoltir af því hvað hin almenna skoðun fólks er á landinu okkar og afurðum þess. Mjög jákvæð og fólk spyr einmitt mikið um framleiðsluhætti okkar á matvælum sem og auðvitað orkumálin sem eru jú mál málanna í veröldinni í dag.

Þegar rætt er um náttúruna, dýrin og umhverfið verður náttúran ávallt að njóta vafans. Það er allavega mín skoðun. En það þýðir ekki að ekki megi og eigi að nýta náttúrunnar um leið og við njótum hennar.

Óður til náttúrunnar í Laugardal

Athugasemdir

[Benedikt V. Warén, 29.6.2008 kl. 13:41]

Gott að þetta tókst svona vel. 

Hvernig væri að endurtaka leikinn og útfæra þetta til þess að skapa störf á landsbyggðinni, t.d. í ferðaþjónustunni. 

Verkefnið gæti heitið "Óður til þeirra, sem vilja verja menningu landsbyggðarinnar". 

[Sævar Einarsson, 30.6.2008 kl. 03:37]

Sóðar til náttúrunnar í Laugardal