Þetta reddast

Dagurinn í dag verður mikill vinnu dagur hjá kokkunum mínum hér í Washington. Það vildi svo illa til að tollyfirvöld hér fyrir norðan okkur í New York hafa nú haldið öllu lambakjötinu sem eldað verður fyrir tæplega 2000 manns á hátíðarkvöldverði samtaka veitingahúsa annað kvöld, í tæplega hálfan mánuð. Kjötið sem kom frá Hvammstanga var flutt fryst og tollyfirvöld vildu skoða það mjög vel og vandlega og þegar við lendum í slíkum málum er ekkert sem hægt er að gera. Það er ekki hægt að tala við nokkurn mann sem að endingu tekur ákvörðun því þeim ber engin skylda til að upplýsa okkur um slíkt.

Þetta hefur því tekið ótrúlega mikinn tíma,   gríðarlega fyrirhöfn og að mörgu leiti leiðindi. Kokkarnir á Hótelinu þar sem veislan fer fram vildu fá kjötið í hús síðast liðinn miðvikudag í síðasta lagi en fengu það inn til sín í gærkvöld bein frosið. Mjög slæmt mál og erfitt fyrir alla. Ég og Siggi Hall höfum því verið á fleygi ferð við að róa mannskapinn og fengum eiginlega hálfgert sjokk þegar kom í ljós að kjötið hafði í raun ekki þiðnað á leiðinni hingað frá NY. Kokkarnir okkar eiga að byrja að vinna í 5 verslunum Whole Foods í dag kl. 11 og vera til klukkan 3. En þessar hetjur Íslands ætla að mæta á hótelið Marriott og hjálpa til við að skera kjötið og vinna það með kollegum sínum. Reiknum með að það klárist því gamla íslenska hugtakið " þetta reddast" virkar nú.

Mér þykir þetta miður því strákarnir áttu að fá að sofa út þennan morgun því búðirnar sem þeir eru í eru allar rétt við miðborgina. Þeir fóru út að borða í gærkvöld á Veitingahúsið EVE sem er í Alexandria í Virginíu fylki hjá matreiðslumeistaranum Cathal Armstrong en hann er einmitt núverandi Matreiðslumeistari ársins hér á Höfuðborgarsvæðinu og Sigurður Ragnarsson vann hjá honum íslenska matseðilinn.

Svo til að kóróna erfiðleikana þá fæst stóra  skyrsendingin okkar ekki afgreidd fyrr en á nk. mánudag en í henni eru  50 lítar af skyri sem átti að nota í eftirréttinn á hátíðarkvöldverðinum. Við urðum því að fá skyr hjá verslunum Whole Foods, safna því saman úr búðum, til að nota í eftirréttinn. En "þetta reddast" Það er nefnilega ekki allt sem sýnist í útflutningi ferskra matvæla og sérlega ekki landbúnaðarafurða. Hér gilda strangar reglur við innflutning rétt einsog í öðrum löndum og getur þetta stundum valdið okkur mikilli taugaveiklun því skyrið hefur til dæmis ekki nema um 4ra vikna geymsluþol og því hver dagur dýrmætur.

Menn halda oft að það sé auðvelt að selja mat til útlanda, en það er nú langur vegur þar í frá og ekki allt sem sýnist. Reglugerðir um innflutning til annarra landa eru misjafnar og öll lönd reyna að vernda sína matvælaframleiðslu. Bæði er það vegna breyttra reglna vegna hryðjuverka svo og hin mikla ógn sem stafar að gæðum afurða og sjúkdómum. Það er til dæmis mikil spenna í viðskiptum á milli Bandaríkjanna og Evrópusambandsins sem hófst eftir kúariðuvanda Breta og enn er talsverð tortryggni í gangi á milli þessara stóru viðskiptasvæða. Við njótum þess í þessu tilfelli að vera ekki aðilar að Evrópusambandinu. Í okkar tilfelli er það kostur.

En til að ná árangir er sem sagt fyrst og fremst um að ræða að sýna verkum sínum þolinmæði og elju. Fylgja eftir málum frá degi til dags og vera reiðubúinn til að bregðast hratt og vel við þeim vandamálum sem upp koma hvaða tíma sólarhringsins sem er.Með það að leiðarljósi og að bera virðingu fyrir reglum þessa lands og hefðum þá að lokum getur maður oftast komist að þeirri niðurstöðu að "þetta reddast"

 

Fullkomið ábyrgarleysi

Ég get eiginlega ekki orða bundist vegna þessa boðað verkfalls. Það er svo ömurlegt að horfa til þess að ferðaþjónustan í landinu er að sligast undan ástandi sem við ráðum ekkert við. Olíuverðshækkanir síðustu mánuði eru ekki okkar sök. Þetta er innflutt vandamál sem við ráðum ekkert við og allir í ferðaþjónustu eiga samúð mína alla. Það er hræðilegt að horfa uppá fjöldauppsagnir vina okkar hjá Icelandair og því miður víða annarsstaðar á komandi vikum og mánuðum. Að menn skuli svo boða verkfall undir þessum kringumstæðum er hreint hneyksli. Stjórnvöld eiga því hiklaust að setja bann á svona óbilgjarnar aðgerðir og samfélagslegan vanþroska. Síðan ætti  endurskoða  rekstur þessarar stofnunar og kanna hvort ekki megi nýta sambærilega þjónustu í nálægum löndum.

Ekkert flogið innanlands í fjóra klukkutíma

Þúsundir kynnast íslenskum mat.

Jæja þá er kynningin hafin. Kokkarnir okkar fóru í fimm verslanir Whole Foods Markets í gær og síðan á þau fimm veitingahús sem taka þátt í kynningunni okkar sem lýkur svo með Hátíðarkvöldverði  fyrir um 2000 manns í Marriott Wardman Hótelinu á sunnudag.

Þetta er líklega stærsta og jafnframt umfangsmesta íslensk matvælakynning sem staðið hefur verið fyrir á erlendri grund. Hátíðarkvöldverðinn sækir að mestu fólk úr matvælageiranum hér í Höfuðborginni og nágrenni, Þingmenn, fjölmiðlafólk, Borgarstjórinn hér í Borginni mikill sómamaður og allir sem eitthvað mega sín í matvælageiranum.

En það er snúið og flókið mál að púsla þessu saman og auk kokkana að heiman fékk ég tvo starfsmenn frá fyrirtækinu sem flytur inn matvælin okkar og svo son minn sem kom hingað til að hjálpa okkur að keyra kokkana á milli verslana og á veitingastaði á hverjum degi en við heimsækjum 10 staði á dag og borgin er frekar stór því við förum líka til Virginíu og Maryland fylkjanna. Þetta er gríðarlega mikil vinna og er ég mjög þakklátur öllum þessum aðilum fyrir þeirra framlag.

Við Siggi Hall förum svo í hádeginu á CBS sjónvarpsstöðina þar sem tekið verður viðtal við Sigga um íslenskan mat og þessa stóru íslandsdaga hér í borginni sem hafa vakið athygli.

Þá þurfum við sjálfir að koma afurðum okkar á veitingastaðina á hverjum degi því við viljum gjarnan að bleikjan sé ávallt fersk þegar hún kemur til þeirra. Að meðaltali má segja að um 300 manns smakki matinn okkar í hverri búð á dag eða samtals um 7500 manns. Þá má reikna með að um 500 gestir veitingahúsanna sjái matseðilinn okkar á dag eða 2000 manns og um 20% af þeim velji þriggja rétta íslenska matinn.

Þá er reiknað með 2000 manns á hátíðarkvöldverðinn og eru það því um 10.000 manns sem fá að smakka íslenskan sælkeramat hér á þessum dögum. Auk þess eru þúsundir annarra sem verða varir við og sjá umfjöllun um það sem við erum að gera hér og því afar skemmtilegt að finna fyrir sífellt auknum áhuga fyrir landinu okkar og afurðum þess. Það virkar líka mjög vel á fólk að heyra íslendinga tala um landið sitt af ástríðu og þekkingu og þar leika kokkarnir okkar stórt hlutverk.

Allt er þetta liður í því metnaðarfulla verkefni að ná til fólks sem kann að meta gæði matar umfram verð og fólk sem hefur góða menntun og fjárráð til að kaupa matvæli sem framleidd eru í sátt við umhverfið og dýravernd höfð að leiðarljósi. Þeir sem vinna með okkur landbúnaðarkörlunum að þessari kynningu eru Icelandair, Icelandic Group, Samherji, Fiskval, Iceland Naturally og Sjávarútvegs og Landbúnaðarráðuneytið. Við dreifum mjög fallegum bæklingi með uppskriftum og upplýsingum um fiskveiðistjórnunarkerfið, landbúnaðinn og ferðþjónustuna þar sem auglýsing frá Icelandair skreytir baksíðu bæklingsins.

Þarna eru því samankomnir í sátt og samlyndi aðilar innan sjávarútvegs, landbúnaðar og ferðaþjónustunnar og vinna að sameiginlegum íslenskum hagsmunum. Vonandi verður framhald á þessu samstarfi því með því móti má ná fram bestri nýtingu fjármuna og beinni kynningu til neytenda. Þessi hilla markaðarins, sælkeramarkaðurinn, hentar okkur því öllum vel því það er og verður ávallt dýrara að framleiða matvæli með þeim hætti sem við gerum og vegna þeirrar velmegunar sem við búum við þá verður Ísland alltaf í flokki þeirra landa þar sem gæðin eru höfð í fyrirrúmi og fyrir það er fólk reiðubúið til að greiða sanngjarnt verð. Sem dæmi um það þá er nú dós af skyri seld hér á kr. 227 á sama tíma og venjulegt jógúrt kostar kr. 74.

Mín skoðun er enn sú að matur er einhver besta leiðin til að styrkja stöðu landsins okkar á erlendum mörkuðum. Það er líka mín skoðun að við eigum að höfði til þess hóps sem hefur ráð á því að versla við okkur og ferðast til landsins og kann að meta það. En það er einmitt það sem við erum að gera og erum því aðeins að selja matinn okkar í búðum þar sem gæðin eru höfð að leiðarljósi og það sama gildir um veitingahúsin en þau eru öll í flokki "Fine Dining" veitingahúsa og hafa hlotið margvíslegar viðurkenningar.

Það að gefa fólki að "smakka Ísland" er mjög árangursrík leið til að koma skilaboðum til fólks um hvað Ísland stendur fyrir. Það er allavega það sem allir eiga sameiginlegt, en það er að öll þurfum við að borða. Öll matvælin okkar eru seld sem íslensk og heita íslenskum nöfnum svosem Skyr, Höfðingi, Stóri Dímon, Smjör og allur fiskurinn er merktur sem íslenskur fiskur og kynntur sem slíkur.

Ég verð því að segja að ég er afar stoltur af þessu verkefni og vildi óska þess að menn fari nú að vinna meira saman að kynningum lands og þjóðar. Þannig og einungis þannig næst viðunandi árangur.

Íslenskir kokkar

Í gærkvöld komu íslensku kokkarnir sem verða með kynningar í verslunum Whole Foods frá og með morgundeginum til sunnudags sem og í 5 fínni veitingahúsum (fine dining). Kokkarnir sem komu eru þeir Þormóður Guðbjartsson frá VOX, Sigurður Ragnarsson frá VOX, Kjartan Gíslason frá Ó veitingahúsi, Guðmundur Guðmundsson frá Hótel og Matvælaskólanum og Siggi Hall.

Til stóð að halda blaðamannafund í dag en vegna fjárskorts varð að hætta við fundinn en í stað þess munu blaðamenn væntanlega koma í heimsókn í veitingahúsin sem kokkarnir elda í á kvöldin eða heimsækja þá í verslanir. Þá hefur verið ákveðið að Siggi komi fram í hádegisþætti CBS sjónvarpsstöðvarinnar á fimmtudag og kynni matinn okkar í beinni útsendingu. Þetta er mjög vinsæll þáttur hér í Washington og verður spennandi að sjá hvort karlinum takist ekki vel upp að vanda.

Það sem verður lögð áhersla á í kynningunum eru bleikja sem steikt verður á pönnu í verslununum og síðan verður gefið að smakka skyr, ostar, smjör, súkkulaði og dreift bæklingum um afurðir okkar ferðamöguleika til Íslands. Í veitingahúsum verður svo boðið uppá þriggja rétta máltíð sem verður einungis unnið úr íslensku hráefni mismunandi eftir stað.

Við gerum ráð fyrir að þessi kynning muni auka sölu í þessari viku um helming og svo verður sérstakt tilboð á sumum afurðanna í vikunni þar á eftir og gerum við ráð fyrir allt að þreföldun í sölu í tilefni þess tilboðs sem stendur einungis  í eina viku.

Síðan er unnið að því að koma íslensku hráefni til veitingahúss í New York þar sem Penguin bókaútgáfan býður helstu fjölmiðlagúrum borgarinnar til hádegisverðar í tilefni útkomu merkilegrar bókar sem kemur út 14 ágúst. Einnig verður tilkynnt um að gerð verði kvikmynd eftir bókinni og mun aðalleikari myndarinnar verða heiðursgestur hádegisverðarboðsins. Það verður spennandi að hitta þetta fólk sjá hvort því líki maturinn okkar. Aðalleikarinn er mikill sælkeri er mér sagt og á meðal annars veitingahús í Mississippi og hefur gaman að kynnast framandi matvælum

Áhrif gengisbreytingar krónunnar er farið að hafa veruleg áhrif á fjármögnun verkefnisins hér en á móti kemur að framleiðendur eru að fá hærra verð heim í hús og það skiptir auðvitað mestu máli.

Íslenskur matur í New York

Þá er undirbúningi fyrir íslandsdagana hér í næstu viku að komast á lokastig. Kokkarnir okkar koma hingað til Washington á mánudagskvöld og undirbúa sig á þriðjudag og síðan byrjar "ballið" Við verðum með eldsbleikju frá  Samherja sem verður pönnusteikt uppúr íslensku smjöri í fimm verslunum Whole Foods á hverjum degi frá klukkan 11 til 15. Þá verða á borðunum sem kokkarnir setja upp, boðið uppá ostana Höfðingja og Stóra Dímon sem og allar fjórar bragðtegundirnar af skyri sem við erum með til sölu hér í Bandaríkjunum.. Þá verðum við einnig  með súkkulaðið frá Nóa Siríus og gefum svo líka íslenskt vatn.

Síðan verð þeir á fimm veitingastöðum hér í borginni á kvöldin. Svo er Gala kvöldverðurinn á Marriott hótelinu sunnudagskvöldið 29 júní og allur maturinn íslenskur einsog ég hef sagt áður hér. Það hefur verið hálferfitt að fá bleikjuflökin reykt hér en í gær fannst loksins reykhús þar sem bleikjan verður unnin. Hugmyndin er einmitt að hún verði framreidd reykt  enda var hún gríðarlega góð einsog kokkarnir á Hótelinu matreiddu hana með félaga Sigga Hall um daginn.

Þetta verður spennandi vika og er mér að takast að fá fólk til að vinna þetta með okkur því það er svolítið mas að koma kokkum til og frá fimm búðum á dag og svo á veitingastaðina á kvöldin en þetta reddast! Það er afskaplega gaman að vinna með Whole Foods í svona verkefnum og þeir eru alltaf til í að hjálpa okkur við að koma nýjum vörum á markað sem er mikil viðurkenning á afurðunum okkar. Ekki spurning. Þá eru okkur mikilvæg þau samskipti sem við höfum átt við alla fremstu kokka borgarinnar. Það eru samskipti sem hafa borgað sig en þau hófust með Food and Fun fyrir sjö árum síðan og nýtast við viðburði af þessu tagi. Það er nefnilega þannig að þeir sem hafa heimótt Ísland verða mjög oft snortnir bæði af landi og þjóð að ég tali ekki um afurðir okkar og vilja allt fyrir okkur gera.

Því er ekki að neita að ég hef lagt mikla áherslu á að byggja upp samskiptanet hér í Höfuðborginni. Borgin er þannig að það er frekar gott að byggja upp og  ná sambandi við fólk hér enda borgin heimsþekkt fyrir að vera borg samskiptanna. Menn hafa auðvitað heyrt um lobbýista og það er sagt að orðið hafi fæðst í gamla glæsilega Willard Hótelinu hér við Hvíta Húsið þar sem fulltrúar þrýstihópa hittust í anddyri hótelsins í gamla daga.Gjarnan gaman að segja líka frá því að hér búa flestir njósnarar í heimunum og menn engu gleymt í þeim efnum.

Það að byggja svo upp sambönd og vera virtur af verkum sínum er gott fararnesti til að hefja innrás í aðrar stórborgir. Þannig getum við bent fólki í Boston og New York sem dæmi, hvaða aðferðum við beitum hér til að ná árangir og þá vita menn hvað gengur og hvað ekki. Þetta hefur allavega virkað. Og reglulega berast til mín tilboð og fyrirspurnir um ýmsar uppákomur sem okkur er boðið að taka þátt í eða að mér er falið að undirbúa viðaburði sem þurfa að vera "öðruvísi". Það er að segja aðilar sem vilja bjóða viðskiptavinum eða blaðamönnum uppá eitthvað sem fólk  hefur ekki smakkað áður og þar er íslenski maturinn alveg sérstakur enda hægt og  rólega að ávinna sér þá virðingu að vera mikil gæðaafurð hvort sem er um að ræða fisk  eða landbúnaðarafurðir.

Ein svona uppákoma mun fara fram á einum af þekktustu veitingastöðum New York borgar hinn1 júlí næstkomandi. Þangað  verður boðið helstu ritstjórum stóru fjölmiðlanna í Ameríku en þeir eru flestir staðsettir í borginni. Tilefnið mun verða heimsfrétt og á eftir  vekja athygli á næstu árum.  Þarna verður einna helstu leikurum Hollywood sem jafnframt er  einn virtasti leikari okkar tíma. Það  verður semsagt boðið uppá matinn okkar og vonandi verða hinir miklu áhrifamenn fjölmiðlanna fyrir góðum áhrifum af matnum okkar. Allt svona skiptir okkur máli því við sem smáríki höfum ekki efni á né getu til að brauðfæða heiminn og verðum því að finna okkur hillu á vettvangi matarins sem hentar okkur í verði og gæðum.

Það vill svo til að  Siggi kemur til New York á morgun og munum við fara á fund með veitingamanninum sem á staðinn þar sem blaðamannafundurinn fer fram. En Siggi er að koma hingað á Íslandsdagana í næstu viku. Þetta hentar því mjög vel. Eina sem er, er að Siggi verður ekki viðstaddur þar sem hann mun sækja fund Norrænu Matar Ambassadoranna hinn 30 júní strax að loknum íslandsdögunum. En vonandi tekst að undirbúa þetta boð vel þannig að menn viti hvað við viljum fá útúr þessu.

Þá förum við líka á fund með markaðsstjórum Whole Foods og Iceladair Cargo vegna íslandsdaga sem stefnt er að verði í "Stóra Eplinu" í haust. Það verður með svipuðu sniði og hér, fimm kokkar að heiman í fimm verslunum og fimm veitingahúsum. Þá  veðrum við  líka með  lambakjöt í búðunum og veitingahúsunum en það er einungis selt sem ferskvara í sláturtíð á haustin.

Verð svo kominn aftur til baka á laugardag og þá munum við hitta nokkra vini og horfa á Holland spila við Rússana. Það verður gaman að sjá þann leik, því að þjálfari Rússanna er einmitt einn af þeim snillingum Hollands sem skapað hefur þennan glæsilega leikstíl sem þeir leika og svo mikil unun er að horfa á. Þá munum við heimsækja veitingastaðina sem taka þátt í dögunum okkar og taka pantanir á matnum sem þeir vilja nota og hafa allt tilbúið á mánudag til að allt fari vel af stað

Evrópukeppnin

Hvað er knattspyrna? Það eru tuttugu og tveir leikmenn, dómari og tveir línuverðir og Þýskaland vinnur! Þessa góðu kveðju sendi ég vinum mínum fyrir leikinn í dag þar sem þjóðverjar unnu Portúgal 3-2. Var þetta ekki dæmigert fyrir margar Heimsmeistara og Evrópukeppnir í knattspyrnu? Það er með ólíkindum hvað Þýska stálið er sterkt. Það seiglast alltaf áfram. Mér finnst í gegnum tíðina sem Þjóðverjar spili alltaf leiðinlega knattspyrnu en verð þó að viðurkenna að hún er oft ótrúlega árangursrík. Það fer líka afskaplega í taugarnar á mér þegar leikmenn brjóta hver á öðrum bara með það eitt í huga að slasa andstæðinginn en það gerðu þjóðverjar einmitt í þessum leik. Því miður og ekki í fyrsta sinn í stór keppni sem þeir eru valdir að slíku.

Það spáðu flestir því  að Portúgalar myndu vinna þennan  leik, en nei það má aldrei gleyma þjóðverjunum. Gat svo verið og var svo dæmigert að þeir skyldu svo vinna leikinn með ólöglegu marki sem allir sáu nema sá  þeir sem þurftu að sjá það. Svo auðvitað vinna þeir Tyrkina sem vinna Króatíu á morgun og svo lenda þeir líklega á móti  Hollendingum í úrslitaleik en þeir þurfa að vinna bæði Rússa og að öllum líkindum Spánverja til að komast í úrslitin. Þjóðverjar eru því líklega enn  eina ferðina að vinna stórkeppni með þessari hundleiðinlegu leikaðferð en það virðist duga.

Ég vona að spá þessi rætist ekki en spennan fyrir næstu leiki verður bara enn meiri allavega hjá mér.

 

Glæsilegt

Mikið er það ánægjulegt og okkur til mikils sóma að bregðast við með þessum hætti á sjálfan þjóðhátíðardaginn. Að gera alvöru tilraun til að bjarga bjarndýrinu með öllum tiltækum ráðum og standa saman um það, þar erum við best.

Svona þjóð erum við nefnilega í hugum þeirra sem til okkur þekkja. Þjóð sem kann að vernda náttúruna og dýrin. Þjóð sem á allt sitt undir náttúrunni komið og er svo háð henni og kann að nýta hana  og njóta um leið.

Ísbirnir hafa  verið mjög áberandi í allri þeirri gríðarlegu umræðu um gróurhúsaáhrifin sem fram fer um allan heim og er í raun tákn þeirrar umræðu. Íslendingar tengjast þeirri umræðu á frekar jákvæan hátt einsog við vitum. Það er fjallað um það hvernig okkur hefur tekist að beisla náttúröflin og nýta orkuna sem og þeirri góðu umræðu sem fram hefur farið um vetnið. Við eru oft assgoti góð þegar við viljum það við hafa og sýnum okkar rétta andlit.

Til hamingju með þessa góðu tilraun góðu landar.

Björgunaraðgerðir undirbúnar

Þjóðhátíðardagurinn

Það er á svona dögum sem maður hugsar heim með söknuði. Það er samt ekkert við því að gera , þetta var mitt val. En maður getur látið hugann reika, kveikja á beinu útsendingunni frá Miðborg Reykjavíkur á Eyjunni.is og horfa á miðborgarstemminguna. Sjá hvað það er fallegt veður og allir svo fínir og sætir. Fólk að fara í skrúðgöngu með börnin, fá sér ís og pylsu og njóta dagsins.

Talandi um pylsur þá sagði hinn eini sanni Bó það við pylsusala hér í Washington þegar hann kom hingað í heimsókn um árið. "Sjáðu til á Íslandi setjum við sinnepið alltaf ofaná". Þetta hljómaði enn betur á ensku þegar hann sagi semsagt: "You know, in Iceland,  we always put the Mustard on top"! Þetta segi ég nú alltaf þegar ég fæ mér pylsu hér í Ameríku því þetta er mikil heimsspeki, að mínu mati.

Til að gera þennan dag eftirminnilegan fyrir mig þá bað ég vin minn á Madison hótelinu sem er hér hinum megin við götuna frá skrifstofunni minni, hann Romeo, sem allir íslendingar þekkja sem þar hafa gist, um að setja upp íslenska fánann í tilefni dagsins. Vona ég að honum takist það þannig að fáninn blasi við þegar ég fer heim seinna í dag.

Ég hef það fyrir sið að fara alltaf á Austurvöll og hlusta á Forsætisráðherra flytja hátíðarræðuna en las hana bara núa á Mogganum og fannst hún mjög fín og Geir farast það vel að minna okkur á að þrátt fyrir allt þá búum við vel. Megum ekki gleyma því að það er ekki langt síðan við fórum í gegnum efnahagserfiðleika sem voru svo miklu verri en nú. Þörf áminning og minnir okkur á mikilvægi þess að vera þjóð, þjóð sem getum og eigum að vera stolt af því sem okkur hefur tekist að gera frá árinu 1944. Það eru ekki margar þjóðir sem geta státað af jafn gríðarlegum framförum og við getum gert. Það skipast ávallt skyn og skúrir í lífinu. Við getum alveg lifað við smá skúri af og til.

Svo ákvað ég að sella mér í pólitíkina hér í landi tækifæranna því valkostirnir sem fólk hér hefur eru aðeins þeir Obama og McCain. Ég fór þá bara "nýja" leið í kynningarmálunum og þið getið séð útkomuna hér:

www.News3Online.com

Svo hef ég líka saknað vina minna og fjölskyldu þegar ég horfði á US Open hér um helgina. Þetta er langskemmtilegasta golfmót sem ég hef nokkrusinni orðið vitni að.  Þetta var einsog að horfa á spennumynd af bestu gerð. Völlurinn var auðvitað "sigurvegari "mótsins. Alveg einstakur í alla staði og er almenningsvöllur sem kostar ekki nema $ 49 að spila á á virkum dögum. Það þarf hinsvegar að panta völlinn með 3ja mánaða fyrirvara. Þetta er greinilega mikil náttúruparadís og leikmenn voru í eilífum vandræðum og sumir bara einsog við áhugamennirnir í skori á vellinum.

Það er líka einstakt að menn haldi sig við þá reglu sem sett var í upphafi þessa móts fyrir meira en 100 árum að ef menn eru jafnir þá verði leiknar 18 holur  daginn eftir síðasta keppnisdag en ekki strax bráðabani einsog oft er eða leiknar 4 holur og svo bráðabani. Þetta er umdeilt fyrirkomulag en virkaði vel í þetta sinn og allir mjög ánægðir með árangurinn. Sumar brautir vallarins voru svo þröngar að þulirnir kölluðu þær keilubrautir.  Tiger sagði svo sjálfur að hann hefði aldrei á sínum ferli leikið jafn ævintýralegt golf og hann lék á laugardag.

Ég hef svo fylgst með umræðu um mótið á Mogganum og er öll sú umræða sem þar er til mikillar fyrirmyndar og vel og faglega fjallað um mótið. Til hamingju með það Mogga menn. Þá er umfjöllun blaðsins einnig frábær um körfuboltann og úrslitakeppnina  sem nú stendur yfir og einnig fagmannlega um hann fjallað. Glæsilegt hjá ykkur og mikill metnaður. Svona eiga menn að vinna.

Það er semsagt talsvert mikið sem ég hef saknað vinanna og fjölskyldunnar síðstu daga. Alltaf gaman að horfa á sportið með vinunum og hittast svo á Humarhúsinu þar sem leikirnir eru krufnir til mergjar á þann einstaka hátt sem menn gera þar. Sakna ykkar strákar en hlakka alltaf til að koma í heimsókn og finna að það breytist ekki neitt. Lífið heldur áfram sinn vana gang.

Gleðilega þjóðhátíð!

 

 

Allt að verða tibúið með Hátíðarkvöldverðinn

 Þá er að verða tilbúin lokaútfærslan á matseðli sem verður í boði árlegrar stórhátíðar samtaka veitingahúsa hér í Washington DC. Upplýsingar um hátíðina má finna á www.ramw.org Mér tekst vonandi að fá myndir af réttunum frá hótelinu sem kynnti réttina hér um daginn og reyni að setja þær hér inn fyrir þá sem hafa áhuga. Hugmyndirnar eru mjög framandi og spennandi ekki síst bleikjan, osturinn í Ristotto og eftirrétturinn, skyr með Nóa suðusúkkulaði. Bara snilld og virkilega bragðgott en um leið mjög framandi. Síðan verður smjör á öllum borðum og borið fram í skálum sem ég lét útbúa og setjum svo Smjör merkið ofan á skálarnar þannig að það fari ekki á milli mála hvaðan það kemur. Það hefur nú verið staðfest að fjöldi gesta verður að minnsta kosti 1800 manns allt fólk úr matvælageiranum hér á Mið Atlantshafsvæðinu. Auk þess mun Borgarstjórinn hér Adrian Fenty verða gestur hátíðarinnar auk nokkurra þingmanna sem aldrei láta þennan atburð framhjá sér fara. Albert Jónsson Sendiherra Íslands  verður einn af heiðursgestum kvöldsins og mun  afhenda verðlaun á hátíðinni þeim meistara sem verður krýndur matreiðslumeistari ársins 2008. Auk titilsins eftirsótta mun sigurvegarinn fá í verðlaun ferð til Íslands á næsta Food and Fun í boði Icelandair. Salurinn verður að vanda glæsilega skreyttur og kvikmyndir frá Íslandi mun verða sýndar á meðan á borhaldi stendur. Allt mjög spennandi og gaman að vinna með þessu fólki sem er að skipuleggja hátíðina. Yfirskrift hátíðarinnar á þessu ári er " Setting The Global Table" og er þemað að kynna í Höfuðborginni fjölbreytileika borgarinnar og allra Sendiráðanna sem hér er en þau um 183 síðast þegar ég vissi. Það má því einnig búast við að Sendiherrar annarra ríkja mæti á hátíðina og er okkur það því mikil heiður að geta borið enn frekar út boðskapinn um gæði okkar fínu matvæla frá sjómönnum og bændum. Adrian Fenty er verulega spennandi stjórnmálamaður og vann kosningarnar til Borgarstjóra hér í Washington með miklum yfirburðum. Ég hef hitt Adrian nokkrum sinnum og hann vill endilega komast heim til Reykjavíkur og er nú stefnt að því að hann verði einn af heiðursgetum okkar á Food and Fun á næsta ári. Ég held líka að það væri eitursnjallt fyrir Reykjavík að mynda "systursamband" við Washington borg og eiga aukin samskipti  á sviði viðskipta og menningar  á milli þessara áhrifamiklu Höfuðborga!? Washington borg er líklega ein allra mesta menningarborg Bandaríkjanna og þar gætu leiðir borganna legið saman. Auk þess eigum við talsverð viðskipti hér í borginni sem fara bara vaxandi. Þetta er bara svona hugmynd sem ég kem hér með á framfæri. En semsagt verður Hátíðarkvöldverðurinn hinn 29 júní en í aðdraganda hans verðum við með kynningar á bleikju steiktri úr smjöri í 25 verslunum Whole Foods auk þess sem kokkarnir okkar gefa fólki að smakka skyr, osta og súkkulaði.  Á kvöldin munu kokkarnir okkar verða gestakokkar á fimm fínum veitingahúsum sem eru: Equinox  www.equinoxrestaurant.com DC Coast www.dccoast.com Beck´s www.beckdc.com Restaurant Evewww.restauranteve.com CityZenwww.cityzenrestaurant.com sem er hluti af Mandarin Oriental Hótelinu  en meistarinn þar hinn geðþekki Eric Ziebold en hann vann titilinn Besti matreiðlsumeistarinn  á Mid Atlantic svæðinu að mati James Beard stofnunarinnar í síðustu viku.  En hér kemur matseðilinnn einsog hann mun verða settur fram með fallegu gullslegnu letri: 

GALA MENU

GLOBAL LIBATION RECEPTION

A Gustatory Tour from the Global Table

Passed Delights and Specialty Stations Paired with an Exciting Array of Wines and Spirits

The RAMMY Cocktail, The Lo-Le Cherry

DINNER

1^stCourse

Apple Wood Smoked Icelandic Charr on a Bed of Fennel Salad, Mustard Cream, Red and Yellow Tear-Drop Tomatoes, Garnished with Capers and Eggs.

2007 Sauvignon Blanc, Nimbus Estate, Single Vineyard, Casablanca Valley , Chile

2^ndCourse

Skyr and Basil Ravioli, Pear and Icelandic Dimon Cheese, Crushed Candied Walnuts

2004 Cabernet Sauvignon Blend, Terra Mater, Maipo Valley , Chile

3^rdCourse

Icelandic Lamb Loin Wrapped in Spinach with Sherry Sauce

Stuffed Zucchini with Mushroom Duxelles, Fingerling Potatoes, Topped with Fried Sage.

2006 CarmenereBlend, Santa CarolinaFamilia Reserva, Rapel Valley , Chile

4^thCourse

Chocolate Skyr Bling

DESSERT BUFFET

Pastries, Cakes and Petit Fours

Ice Cream and Sorbet Cart

Golden Cup Cakes

By

DC Central Kitchen Culinary Students

Santa Lucia Estate Coffee Bar

Marriott Wardman Park HotelExecutive Chef Horst Lummert

Consulting Chefs- Siggi Hall, Chef, Reykjavik , Iceland &

Greg Sharpe, Executive Chef, Walter E. Washington Convention Center

Global Celebration continues with dancing to the Music of DC’s own ONYX

 

 

Capital Pride í Washington

Um þessa helgi fer fram hin árlega skrúðaganga sem áður hét Gay Pride en heitir nú Capiltal Pride. Þessi viðburður sem byrjaði sem hátið samkynhneigðra er nú orðin ein alsherjar hátíð svokallaðra minnihlutahópa en samkynhneigðir þó enn mest áberandi á hátíðinni sem stendur í þrjá daga. Það er reiknað með að til borgarinnar komi um það bil 200.000 gestir víða að, ekki bara héðan frá þessu stóra landi,  heldur líka fjöldi erlendra gesta. Hátíðin ein allra fjölmennasta sem fram fer hér í landinu af þessu tagi og mikið, já reyndar gríðarlega mikið um dýrðir í orðsins fyllstu merkingu.

Í dag laugardag hefst gangan og eitt aðalhátíðarsvæðið þar sem gangan fer um er einmitt við verslun Whole Foods Markets við P Stræti en það er sú verslun WFM þar sem við höfum gert upphafstilaunir ( pilot marketing) með okkar frábæru íslensku afurðir. Þessi verslun er ein söluhæsta verslun WFM í Bandaríkjunum en er samt ekki mjög stór í fermetrum talið. Þar verður því mikið um að vera í dag og mun ég reyna að hjálpa þar til við kynningar á afurðum okkar allavega eitthvað frameftir degi. Það hefur ætíð verið spennandi að hefja tilraunir í þessari búð vegna þess að viðskiptavinirnir eru af mjög fjölbreytilegum uppruna. Það hefur reynst þannig að ef þessi búð selur okkar afurðir þá verða þær vinsælar allsstaðar annars staðar.

Seinnpartinn í dag efnir Íslendinagfélagið hér á svæðinu til mótttöku í samráði við Sendiráð Íslands til samkomu á heimili Sendiherrans í tilefni þess að Þjóðhátíðardagur okkar er í næstu viku. Það er því ávallt haldið uppá daginn um helgar. Það hefur verið gaman að hitta landann á þessum stundum. Það er nefilega þannig með íslendinga að þeir verða því meiri íslendingar eftir því  sem þeir dvelja lengur að heiman. Þetta er fólk sem rekur fyrirtæki hér á svæðinu, skólafólk, fólk sem hefur eignast maka hér eða með einum eða öðrum hætti æxlast þannig að það  hefur sest hér að af ýmsum ástæðum. Upp til hópa spennandi fólk og skemmtilegt.

Ég er líka á þeirri skoðun að það sé afar mikilvægt fyrir fólk og kannski einkum okkur íslendinga að kynnast lifnaðarháttum og menningu annarra þjóða. Með því móti getum við gert sanngjarnan samanburð á okkar þjóðfélagi og öðrum. Mér finnst ég hafa haft gott af því og segi það sama um þá landa mína sem ég hitti víðsvegar um heiminn. Mér fannst það því dapurlegt að sjá einn af Þingmönnum landsins gera lítið úr því að íslendingar byggju erlendis.  Það er mín reynsla að fólk á enn sterkari taugar til landsins okkar þegar það hefur búið erlendis í tvö ár eða lengur og  horfir heim í fjarlægð með augum gestisins.

Mér var sagt það fyrir löngu síðan að orðið heimska hefði einmitt þýtt að sá sem ekki fer útfyrir túnfótinn sé heimskur því hann hafi ekki séð heiminn. Heimskur þýðir því ekki að fólk sé illa gefið, það þýðir bara það að fólk hafi ekki haft tækifæri eða vilja til kynnst öðru en sínu þrengsta umhverfi og geti þannig orðið nokkuð sjálfhverft. Það felast mikil lífsgæði í því að vera íslendingur í útlöndum. Hversvegna? Jú vegna þess að fólk hittir nú ekki íslending á hverjum degi og þessvegna verður íslendingurinn spennandi. Við njótum þess líka meðal þeirra sem eitthvað þekkja til landsins, gæti trúað að það væru svona um 3% af íbúum heimsins, að ímynd landsins er bara mjög fín. Það er líka alltaf hægt að segja spennandi sögur af Íslandi því við erum svo skemmtilega skrítin þjóð í jákvæðri merkingu orðsins.

Í lok þessa mánaðar koma einmitt hingað til okkar fimm fínir kokkar að heiman til að elda og gefa fólki að smakka íslenskan mat í verslunum og á veitingahúsum. Það kostar jú meira að fá menn að heiman en virkar alltaf mjög vel því  okkar menn eru mjög frambærilegir og skemmtilegir upp til hópa og vekja mikla athgyli. Það er voða gaman að heyra þegar fólk spyr þá hvaðan þeir séu og þeir svara: "Ég er frá Íslandi". Ha kominn alla leið frá Íslandi? Ég hef aldrei hitt íslending fyrr, ertu virkilega þaðan? Þá eru okkar menn með svörin á hreinu og geta sagt frá því  að Ísland  sé nú ekki svo langt í burtu. Bara fimm klukkustunda flug. Þeir segja sögur af bændum og sjómönnum. Hvernig föðurnöfn eru enn virt, hvernig við virkjum orkuna og svo framvegis. Skapast alltaf skemmtilegt andrúmsloft í kringum "strákana" okkar.

Já það er gott að vera íslendingur í útlöndum.